星期一, 5月 31, 2010

上海世博搏命遊(五)

遊世博,唔係講緊要睇幾多國寶,幾多尖端科技,而係講緊點樣去感受一個國家!

從火山爆發感受冰島

從Tango感受阿根廷

從天寒地凍嘅印象感受挪威

從IKEA式陳設感受瑞典

從一本百科全書感受孟加拉

從現代藝術感受越南

從觀念感受尼泊爾

從成身白雪雪嘅男人感受阿聯酋

從重視嘅一個字,感受一個國家

另外,地圖上科威特館該存在嘅位置,只有一座冇任何裝飾嘅臨時建築,科威特消失咗!!!

世博值得去,因為呢個係真正嘅世界之窗。

星期六, 5月 29, 2010

上海世博搏命遊(四)


「城市,讓生活更美好!」我第一次見呢句世博slogan,已經諗超~講乜Q呀!不過念著祖國仍停留於發展中國家嘅思維,而且又要將近年嘅「經濟發展」合理化,唯有表示理解同容忍。到出發前上氣象局查天氣,發現網站頂頭有句「氣象,讓世博更美好!」,真係連膽汁都嘔埋出嚟,喂,唔好咁樣侮辱中國文字好喎!

後來知道世博slogan原來係Better City, Better Life,即刻順氣好多!換句話說,中文版說法可以同英文版反向發展,你有你可持續發展,我有我大興土木,中文世界與英文世界河水不犯井水。

喺東方航空機上,著陸前,機組人員讀出一段歡迎遊客參觀世博嘅英文訊息,有朋友話聽到個空姐將Better City, Better Life講成「Bad City, Bad Life」,好誠實!好好笑咁話!不過我覺得其實佢只係輕音咗同某啲音發唔到,同好多國家口音類似,我哋講開廣東英文聽唔慣啫~

成個世博會都係搞visual,搞3D,panorama同變色LED,better city = newer technology,但又有啲流於無聊。加拿大Montreal館有條環保宣傳片係mechanical 3D,一格格升高,幾過癮,不過即係要用摩打,咪又用多啲電囉~

芬蘭館描述嘅未來城市畫面--芬蘭國寶Nokia為你留影,遊客樣貌會走入大屏幕裡面!

窮啲嘅國家又點呢?孟加拉館成個館基本上貼十幾張海報就算,另外賣下手工藝咁。我覺得貼海報呢招都ok,只要揀得好,足以令遊客了解國家文化,又夠環保!呢張「數碼孟加拉」,同得四幅牆嘅孟加拉館相映成趣,說明幻想係無限嘅!

約旦館主力sell死海,呢邊廂講死海水位逐年下降,嗰邊廂大賣死海鹽產品,仲可以即場享用死海泥facial服務 (當然係收費嘅)!

由中國俾錢起嘅非洲聯合館,好似一個廢置嘅商場,但勝在冷氣夠勁,適合歇腳。非洲國家冇咩好搞,都係賣下精品同非洲鼓咁。呢個檔口特別啲,有土著求偶MV睇,幾得意喎!但係我連個國家名都唔記得囉.......

丹麥某城市嘅案例館,展出多款功能單車!呢架係腳踏BB車,可以放兩個B,備有安全帶,仲有幾款不同設計!單車上路,才是王道!負責介紹嘅丹麥哥哥話我哋講high-level English,可想而知,佢每日serve啲咩人,有幾悶~ (按:唔係個個館都由該國派員當值,好多館都係中國人serve你,幾冇feel。有時又會有啲西人自命普通話好,服務殷勤,但係你一同佢講英文,竟然即刻變臉......)

古代的聚落,攝於土耳其館。個土耳其管理員話香港好貴,唔捨得去,叫我哋有時間一定要去土耳其睇下!

Better City, Better Life,你話,我哋到底喺度追求啲咩呢?喺龐大嘅世博會背後,又掩飾咗幾多嘢呢?


Future係咁?好驚呀我!!

(唔好意思,為咗畫面美觀,我cut走咗上面句中文)


~第四節完~

星期五, 5月 28, 2010

上海世博搏命遊(三)

地圖翻閱者與迷途小羔羊,咩~~~~~~!!!

呢個國家展館非常親民,喺無聲無息之間,已經俘虜咗千千萬萬中國同胞嘅心!人工草地上,一地都係大大細細嘅小綿羊,雖然質感膠到無倫又輕飄飄,但隻隻神態不同,又可以搬來搬去,成為遊人行到攰晒時嘅最佳伴侶!

無論男女老幼,都一樣咁鍾意啲牛奶糖色小綿羊架!

呀婆你好重呀!我好細隻咋!

隻羊嘅細節係要造到咁唔具體,先會達到呢種藝術效果!假羊,同真人,形成一幅幅真實嘅生活影像!

好難得見到中國同胞活得咁悠閒舒暢!呢樣嘢,就算中國館再大都俾唔到我哋!

呢個咁可愛嘅國家就係荷蘭嘞!館內有梵高作品睇,仲展埋畫中原裝實物,抵睇!


~第三節完~

星期三, 5月 26, 2010

上海世博搏命遊(二)

睇展館之前,不如同大家先進入園區了解下環境!呢日落雨兼D、E區少人,義工們爭取機會刨地圖~ 又係嘅,嗰時先開園幾日,應該未熟晒~ 呢啲年輕志願者OK架!態度親切有禮,我哋問過幾次嘢,都冇話點錯你!

呢段溫馨提示,可以列入中國特產~

叔叔頂帽寫住「文明觀博」,咦,statement,fashion嘢喎!

園內穿梭巴士,電池車嚟,最盞鬼係一埋站就叉電!咪住先,呢類電車,我有冇喺第二度見過呢?真係唔記得咗!

搶搭巴士嘅真實情況......唔,我都係行路算......

呢架電池車,靜英英架,不過太靜都有危險,路人察覺唔到~ 聽講有人建議要加返噪音......

下沉式廣場呢個詞實在太驚嚇,你唔好話俾我聽係從英文譯返嚟呀!

超乎常識題:呢句Paradise for People,喺邊個國家展館呢?請回答!

奇景圖:《中國人在黑山》


~第二節完~

星期二, 5月 25, 2010

上海世博搏命遊(一)

我哋上上海嗰日係五月七號,個個都話,而家上去,唔怕逼死麼?日子我冇得揀啦,話說今次上上海,係多得伍卓賢先生套accapella劇「石堅」代表香港喺上海大劇院演出,仲要係第一個香港團體上去,我作為寫過幾隻字嘅參與者先有得猛車邊一齊去咋!幾威~ 關於個演出,不如留返最後先講,都係開咗世博呢個話題先!

好多人問,係咪真係好逼呢?我可以話,yes & no啦!邊個叫你係都要揀啲要排三個鐘嘅館入啫?大部份館都唔駛排隊架喎!講真,要排隊嗰啲多數係搵你笨,入過你就知~ 反而有啲偏門細館會有驚喜,你勢估唔到蒙古館有恐龍化石睇喎,呵呵呵!

又有人問,啲「大陸人」係咪好冇禮貌,好唔守秩序呢?唉,點講呢?文明呢家嘢,逼唔嚟嘅!唯有寄望佢哋見下呢啲大場面,吸收下人哋外國好嘅文化啦,不過我覺得都好忟水......我上大陸次數都唔算好少,一直都講唔出「大陸人」或「中國人」嘅問題喺邊,今次睇完石堅綵排同演出,加埋三日三夜世博大拚搏之後,我終於明晒喇!其實好簡單,就係目中無人之嘛,呢個雖然係一個重面子嘅民族,但係好奇怪地,佢哋又唔多理人感受,所以,插隊打尖一啲都唔會唔好意思,撞到人唔會say sorry,用手踭推開你都係咁話啦!自己唔蝕底最重要,你係外人,三九唔識七,我駛鬼理你!(題外話,其中有日同大帝去「松江大學」附近探朋友,我哋係咁講「鬆踭大學」,仲話唔怪得呢度啲人咁訓練有素~)我愈諗就愈覺呢個「目中無人論」值得深思,餘下三萬字,我交俾陶傑!

總之,去到呢個世界級嘅盛會,你會見到好多奇異嘅場面,分分鐘好睇過個展覽本身!舉個例,女廁三十幾格竟然只有兩格係坐廁,呢個睇怕已經係中國遷就「外國人」嘅極限!而最「先進」嘅自動沖水馬桶,你等極佢都唔沖喎,又懷疑佢壞,又懷疑係自己蠢唔識用,搞咗好耐,放棄,開門,先知原來個裝置係等你開咗門先沖水,撞鬼你!

不過呢,唔駛驚嘅,呢啲嘢,只係去到好笑嘅程度,唔恐怖嘅,呢個第一次喺「發展中國家」搞嘅世博,係可以一去嘅!


第一日入園,落雨加上揀咗個冷門入口,烏蠅都冇隻,good!但俾指示牌老點,我哋好心講返俾工作人員聽,以免他人受害,個工作人員死都唔肯行過去望,仲堅持話我哋睇錯 -_-"......準備過安檢,冇人排隊都要喺欄杆兜二十個圈,問工作人員可唔可以開放欄杆,佢話唔可以,中國好嘢!

如果想入中國館,就要朝早九點前喺園區入口排隊攞預約票,當日我哋八點鐘去排隊,順利攞到預約票;最新消息係七點去排都攞唔到,要第二朝六點再去排,平日喎。

做好東道主?Well,喺上海某歷史悠久嘅四星級飯店,櫃面員工竟然為咗double同twin room嘅定義同客人爭持......同志仍須努力。

~第一節完~

星期一, 5月 24, 2010

搬家了!

你們好嗎?

幾星期沒更新yahoo blog,
再登入已慢得不能忍受,
就藉此機會乾脆把blog搬過來好了!

明天吧,我會開始上載五月初去上海世博的圖片,
希望健忘的我還沒有忘記那些要與你們分享的感受!

新朋友舊朋友,大家先來留言報個到,say個hi好嗎?

Hola! 這是城市案例館 - Madrid