如果看見明天

常常有人問我，今年書展有何新作？不好意思，答案總是令人失望。我也希望有一天會再寫一些有意義的書，待日子成熟吧！

不過，今年也算有好消息，因為影音使團將在書展期間推出一張影視福音歌曲合輯，其中大部份歌詞是我寫的，我自己也很喜歡這些創作，希望和大家分享！

現送上其中一首歌《如果看見明天》，這是正生書院事件時期寫的，配合電視劇集，觀眾反應不錯。唱片收錄的版本將由另一位歌手演繹，遲些這首歌將會出現三個不同版本......

Shanghai is Cute!

"上海咖啡，可能係世界上最大杯嘅咖啡......"

最貪吃的電話號碼－－我吃我吃我吃吃吃！

新派食肆，人流不多，星期五午餐免費！

泰式菠蘿炒飯也算創意炒飯？是誰的創意？

這個還真貼心的～

不知怎麼說，就是......很浪漫的感覺～

與可愛的人同遊就是會看見可愛的東西，不是嗎？

By the way，今天開了新浪微博，想試試會有甚麼發生，大家有興趣可進去看看～

http://t.sina.com.cn/youseehand

內容方面，這邊會講那邊不講的事，那邊也會講這邊不講的事，嘻嘻......

上海世博外傳－－快捷酒店館

有人問我，世博期間難唔難book酒店呢？難就唔會難嘅，貴咗就一定。如果去中旅社問，平時三百幾蚊嘅準三星酒店會變成六百幾蚊，咁不如自己上網搵啦。今次演出，大會安排嘅四星級historical酒店，續住一晚要六百五十蚊人仔，完全唔符合我哋嘅經濟原則，所以我哋搬咗去徐家匯一間三百蚊一晚嘅快捷酒店。咦，好OK喎！

之前往嗰間四星，因為名氣大掛，服務一般，甚至竟然夠膽同客講double room即係兩張床(佢哋冇留到大床房俾客人)，當agent走去同經理理論，即時大串大串上海話左右橫飛，嘈鬼死人！人哋話上海人講嘢似鬧人，我都係第一次見識。但嚟到呢間快捷酒店，就好似去咗另一個國家......點講呢？好似去咗台灣！服務員親切友善，感覺有文化，而且大堂空間好舒適，設計又周到(例如櫃台下面有一格俾你暫放手提袋），令人覺得集團老闆或分店老闆一定係有見識嘅人！

至於房間，係簡約嘅loft格調，光線充足，乾淨舒服。二百呎地方，因為一啲設計上嘅小心思而變得寬敞。沖涼房同廁所作Ｌ型安排，將兩個空間分開，而最過癮嘅係，中間玻璃門竟然係share嘅！

又係喎，沖涼同去廁所兩件事唔會一齊做，一度門就得啦，哈！

留意門嘅兩面手柄，都係按實際功能設計，配合人體工學！

洗手盤係開放式，紅色間隔牆同大鏡都增加咗室內空間感。

既然廁所都透明，沖涼房呢塊鹹濕玻璃又點少得呢？我唔知係咪大床房先有，如果唔係couple住點算？咁沖涼房都可以落簾嘅......除咗傳統花灑頭，呢度仲裝咗熱帶雨林花灑，冇浴缸都有另一番樂趣！

玄關，作用係分隔著鞋區同拖鞋區，同時分隔地面空間，感覺大啲；全身鏡同掛衣架嘅位置都係諗過嘅(咁細間房冇衣櫃啦) ～ 你睇我哋兩個人幾少行李！

真係幾透架！哈哈 ～ 睇唔到嘅睇唔到嘅......

臨離開時，都幾唔捨得呢間酒店！酒店有單車租都冇時間、冇力玩......下次啦～

上海世博搏命遊(十)

好啦，講咗咁耐，講埋中國館。我哋好彩，開園第二星期入園，個個都以為開園初期會好多人而唔敢去，點知原來嗰時入園人數最少(每日十幾萬人次)。想入中國館，首先要九點開園前去到門口排隊攞預約券，我哋嗰日八點到，好彩攞到！聽講後來有人六七點去都攞唔到，即係話第二日要再排一次.......

拿穩預約券之後，當日可任何時間再去中國館排隊......係呀，都要排架！想慳時間，就要估計邊段時間最少人，例如一大早同夜晚都可能係最多人嘅時候！我哋三四點排，排咗半個鐘左右，算好快，入到中國館區，又可以再排過隊喇！(圖為清潔工人喺度清潔特長扶手電梯，民工代表是也～)

領導：哈哈哈哈！你睇，普天下都排住隊嚟睇我哋中國館！祖國真係偉大！

年青一代水準要高，要有型格，你睇呢兩個服務員似唔似登台？後面呢，就係下一個排隊位置－－排隊搭電梯上展館(呢度又差唔多排半個鐘，我哋真係真係好好好好彩架喇！)，電梯概念係扮一架火車，2046 feel，莫名其妙～

公安／守衛從高處監察：我哋對社會和諧好重要！

千辛萬苦入到館內，都未即時睇到清明上河圖動畫住架！所有人都要先睇一段片，段片講中國人民解放幾十年來點樣捱出新天地，邁向經濟起飛，故事係賣親情愛情好煽情嗰款......而幅巨型清明上河圖動畫呢，有啲人驚為天人，有啲人就極度不屑，我覺得其實ok嘅，之不過我記得睇麥兜時見過呢個concept囉......另外，同場都有清明上河圖真跡睇，但要企喺行人輸送帶離遠睇，即係每人只可以睇十秒左右，完全唔俾人深究，好嘢！

離開呢個廳，經過一大片變色LED area，唔知做乜，惟有自拍，哈！

長長嘅走廊，掛咗大量兒童畫，收集自國內各大小省市。睇到呢啲畫，第一個感覺係好勁，第二個反應係好驚，八歲人仔畫咁樣嘅畫，似係少年宮式特訓，加上嚴謹嘅西洋技法模仿而成，仲要張張都係咁上下質素囉。

記得藝術課miss先前向我哋介紹中國館，講到設計運用咗抖拱原理，我問佢：啲紅色陣係咪穿過整個結構？空間會否被分隔？中間駛唔駛開門？老師答唔到我，我惟有自己親身入去睇。入到去，當然發現抖拱只係外觀設計，裡面係通晒嘅。至於咁大嘅空間要嚟做乜？除咗放置巨型清明上河圖，仲有過山車你坐囉，真係遊樂場嗰啲呀，問你死未！

中國館最令我留戀嘅，係呢幕「日落世博」......

祖國呀祖國，你到底想點呢？我get唔到呀。

～第十節完～

P.S.1 日本館 －－ 日本館係唯一一個我哋願意花一小時去排隊嘅館，期間要忍受隊中同胞些少無禮衝撞，而結果入到去，只係見到幾間大企業用一啲好唔型嘅手法sell幾件future product。成個流程裡面，我搵唔到我所認識嘅日本，展品九唔搭八，講解冗長沉悶(由中國人主持)，仲要規定咗每部份二十分鐘，三部份加埋一個鐘(所以外面咪排長龍囉！) 而出奇嘅係，我哋睇到媽媽聲之餘，同胞們又似乎幾滿意，令我哋懷疑，會唔會係聰明嘅日本人，比西方國家更清楚中國人嘅口味呢？

P.S.2 日本館嘅presentation，如果喺香港發生，散場時一定全場媽聲四起，但呢個情況並無出現，眾人安靜離開，此為內地人比香港人有品嘅地方。(但入座超快，幾百個位三十秒坐滿，可入健力士大全。)

P.S.3 關於清唱劇《石堅》嘅演出，有啲嘢都好離奇，例如喺上海大劇院呢種一級演出場地，竟然會發生若干當地人員阻礙排演嘅情況，詳情唔多講，總之挑戰香港台前幕後嘅應變能力。而入場者身份都好離奇，例如有人喺演出期間拎蛋糕出嚟食，到底佢哋係咩人呢？佢哋睇完個劇又有咩意見呢？呢一切，同好多嘢一樣，已經掉入無底黑洞...... 上海記者問我哋覺得上海同香港相比如何，你叫我點樣講呢？我羨慕你哋地方大過香港囉，真心。

上海世博搏命遊(九)

行世博其中一種最大樂趣，就係勁掃細館，即係綜合展區嗰種，好集中，冇乜人去唔駛排隊，唔多嘢搞好快睇完，一個鐘可以掃八個館！觀眾亦可藉此認識下啲相對陌生嘅國家，例如神秘的中亞，呢啲地方，你唔係旅行家真係好難有機會去到。

細館唔等於唔好睇，就好似呢個吉爾吉斯館，啲手工人仔好吸引我，個個神情都好特別，啲衫又靚，樣子又有特色，唔似我哋平時見開嗰啲一式一樣嘅都市式潮爆傀儡公仔。細國雖然資源同財力唔夠大國多，唔可以好似中國咁將所有嘢放到最大size，咁就不妨將啲嘢縮細嚟睇囉，細都有細嘅好處......

每個國家每個民族，都唔希望有動亂......

希望國民可以齊齊整整，人與人之間和平共存......

但係當國家裡面出現矛盾同仇恨，應該點處理呢？

呢啲唔單止係領導層嘅視野同能力問題，亦一定係歷史嘅問題，必須正面面對，從根本去解決，拆開矛盾，消除怨氣......

神奇女俠嚟喇！吉爾吉斯謝安琪～

場館職員一邊當值，一邊整手工藝品賣。能夠活喺以手工藝維生嘅時空，感覺真係好幸福，我懷疑我前世(如果有)都係做呢啲嘢嘅。

一個公仔賣一百三十五蚊人仔，其實我都好想買，但目前已經擁有太多娃娃，都係好不負責任咁影張相算......物質，真係不能擁有太多～

我覺得呢個logo好有意思，舞者、獵人、牧畜、花草、飛鳥、野生動物同傳統圖案，驟眼看來就是一體，結合成完整而獨特嘅生活國度。希望吉爾吉斯騷亂早日平息，烏茲別克族人搵到安全嘅落腳地。

～第九節完～

上海世博搏命遊(八)

唔好意思，又隔咗咁耐～過去一星期又忙又病又要陪睇波，尋晚睇電視辯論又激氣，都係平心靜氣返返嚟講埋個世博先！最近有消息話，荷蘭館啲羊咩已經俾人整爛晒，唔係呀嘛？聽到真係幾心痛，好多人仲話諗住九月先去，到咗九月，啲嘢都唔知變成點......

喺我心目中，如果西班牙館排第二，第一位就係英國館。呢座蒲公英建築，我睇資料時已經覺得好勁，硬崩崩嘅建築物竟然可以變出如此柔軟嘅錯覺。未去世博之前，聞說有內地人話排幾個鐘頭入到去原來冇嘢睇，大呼搵笨，到自己親身睇過之後，再一次證明，凡事都要用自己嘅經驗去判斷，因為唔同人嘅角度真係會好唔同。

下午時分，好多人排隊，所以影下外觀先，夜晚臨閉館先入。外牆並冇標明英國館，但你睇到個米字就一定認得，而且個米字仲係由物質距離嘅明暗層次構成，加上成個館內外都冇任何大字，唔駛講咁多，呢啲咪叫高囉。

一入到去，嘩！俾數以萬計嘅種子包圍，有一種說不出嘅震撼。點講呢？係比喻、係生命，係從生命去睇生命，從生命去演化生命、培育生命。世博完結之後，呢啲種子棒會分發到中國大大小小嘅學校，係英國送俾中國嘅禮物。

呢個意象，我總係覺得好matrix。

有光、有形、有層次，單係視覺上已經好靚！

最奇妙嘅係，每一顆種子都有自己獨特嘅形態......

Better City, Better Life, 如果你用呢件installation交功課，低水準嘅老師會話你離題，仲會因為你唔寫解釋而扣分。

入夜，滿園萬紫千紅之間，英國館係最低調嘅一個，但又最引人入勝。佢可能係最慳電嘅一個館，acrylic種子棒嘅LED由內而外由外而內，幾乎係成個館嘅唯一光源。行出空地，坐一陣，感受一下寧靜，開始唔捨得走，呢個係設計旅程嘅一部份......咦，原來我哋睇緊星喎！

生命就如滿天繁星。

That's Sustainability.

(P.S. 按館內年青中國職員嘅說法：英國向來俾人「保守嘅印象」，所以呢次設計師要發揮英國人嘅「創意」......我哋問該職員，覺得呢個館設計如何，佢話：我覺得還是挺有創意的.......。講真，作為中國人，我實在冇辦法用保守嚟形容英國。咁中國幾時先整啲新嘢出嚟俾人睇，唔再玩四大發明同古代建築呢？)

～第八節完～

上海世博搏命遊(七)

唔好意思，行開咗幾日，完成咗2010年另一經典project"Cruising Mama"。嗰啲唔講住，返返世博先，係時候講下西班牙。話說我遊完世博，突然發現世界嘅中心係喺西班牙，我喺facebook一講完，即刻有人舉腳贊成，有人就Ｒ爆頭，西班牙喎，有冇咁厲害呀？咁你有冇睇上屆歐洲國家盃先？

喺世博，除咗西班牙館，我哋仲參觀咗三個西班牙城市嘅案例館，結果冇一個令我失望。呢幾張萬花筒，係攝自巴塞羅那館，鏡面反射嘅電光幻影加上on晒beat嘅音樂，睇到我哋如癡如醉......

一個城市嘅不同面貌，咁樣present，震撼何止十倍......

巴塞羅那館嘅設計，就係要你俾呢個多元化嘅城市重重包圍，喺pattern裡面重新發現各種美態，好artistic。話說回來，現代藝術雖然起源自巴黎，但係將之推到極致嘅，卻係西班牙人畢加索，仲有超現實畫家達利、古靈精怪建築師Gaudi等不計其數，西班牙人嘅冒險精神同衝勁，可以話係世界重要嘅動力！你睇皇馬同巴塞！......

我哋行埋個裝置睇咗好耐，有個中國職員過嚟，好好心咁同我哋講解：呢個裝置係利用鏡嘅反映......嘩，唔該晒，我夠知你阿媽係女人！我話，其實我係喺度研究緊啲鏡嘅角度，個中國職員接唔到嘴，就咁彈開咗。睇完成個館之後，我向個西班牙職員表示對呢個設計十分欣賞，亦確認我對個概念理解冇錯，而旁邊嘅中國女職員，就力sell我買杯西班牙紅酒，come on！我唔要消費呀！

你可以話，西班牙有嘅嘢，好多地方都有，但佢哋比我哋更識得把握同深化每一種美麗.....

而呢個就係西班牙館，座落高質素嘅歐洲區，外型依然非常突出。佢係由好多塊彎曲嘅草蓆砌成，呢種不規則形狀，演繹出一貫西班牙式豪邁；深深淺淺嘅鋪排，唔係art係咩？職員話，個設計師係女人嚟。

至於場內做乜？主題都係videos，用影像向你介紹西班牙。呢個廳特別之處，在於videos維度嘅使用，邊個話一定要平面，一定要3D，一定要panorama呢？諗多一步得唔得先？

西班牙館嘅旅程以呢個機械巨Ｂ作結，寓意未來生命唔駛多講。好多人對住個巨Ｂ拍手，西班牙職員話，因為德國館有聲控機械人，一眾中國同胞就以為呢個都係，起勢拍手。喂！同胞們，呢個機械巨Ｂ嘅精髓，係在於細緻嘅表情變化喎！

呢啲唔喊唔笑嘅樣，中國館一定唔俾～

喺西班牙館，我真係睇到盼望喎！

～第七節完～