上海世博搏命遊(六)

一大朝早嚟到歐洲區，超興奮！見到呢座丹麥館，除咗覺得佢白雪雪好靚之外，唔入到裡面，都唔知道呢舊嘢嘅設計有幾「高手」！

傳說中丹麥館有單車踩，果然成個館都鋪晒單車徑，但見啲單車泊晒喺度，都冇得玩嘅～ 我懷疑曾經試過俾人玩但發生混亂，純估。

係喎，條美人魚過咗嚟，就咁放喺度？咁大地方得呢舊嘢？

Zoom埋去影張相睇下先，又幾蕭殤咁喎......

沿住館內斜路一路行，你會不斷發現新角度，原來每一個角度都咁靚！(最近畫緊人體畫嘅我，更加對呢啲造型感興趣) 如果唔係條路咁設計，我都未必識得自發從不同角度睇一件人物雕塑～

除咗三百六十度環迴欣賞，條path仲會帶你從高角度睇！係喎，平時真係好少從呢個角度睇雕塑～ 自然陽光同水波嘅配合，更加係美妙絕倫！

館內呢張出奇不爾嘅「波浪長椅」，唔攰都要坐下！

由室內走到室外、由下而上又上而下都係同一條直路，成個館concept非常簡單(或非常不簡單)！丹麥館係其中一個俾到我perfect experience嘅館，亦係難得一個冇使用任何電子展示器材嘅館，反而會派一本關於丹麥嘅迷你書仔俾你返屋企慢慢睇，你又可以即場買丹麥曲奇食！簡約、精準、睿智、從感受出發、無多餘細節，北歐真係走在人類最前線！

~第六節完~

上海世博搏命遊(五)

遊世博，唔係講緊要睇幾多國寶，幾多尖端科技，而係講緊點樣去感受一個國家！

從火山爆發感受冰島

從Tango感受阿根廷

從天寒地凍嘅印象感受挪威

從IKEA式陳設感受瑞典

從一本百科全書感受孟加拉

從現代藝術感受越南

從觀念感受尼泊爾

從成身白雪雪嘅男人感受阿聯酋

從重視嘅一個字，感受一個國家

另外，地圖上科威特館該存在嘅位置，只有一座冇任何裝飾嘅臨時建築，科威特消失咗!!!

世博值得去，因為呢個係真正嘅世界之窗。

上海世博搏命遊(四)

「城市，讓生活更美好！」我第一次見呢句世博slogan，已經諗超～講乜Ｑ呀！不過念著祖國仍停留於發展中國家嘅思維，而且又要將近年嘅「經濟發展」合理化，唯有表示理解同容忍。到出發前上氣象局查天氣，發現網站頂頭有句「氣象，讓世博更美好！」，真係連膽汁都嘔埋出嚟，喂，唔好咁樣侮辱中國文字好喎！

後來知道世博slogan原來係Better City, Better Life，即刻順氣好多！換句話說，中文版說法可以同英文版反向發展，你有你可持續發展，我有我大興土木，中文世界與英文世界河水不犯井水。

喺東方航空機上，著陸前，機組人員讀出一段歡迎遊客參觀世博嘅英文訊息，有朋友話聽到個空姐將Better City, Better Life講成「Bad City, Bad Life」，好誠實！好好笑咁話！不過我覺得其實佢只係輕音咗同某啲音發唔到，同好多國家口音類似，我哋講開廣東英文聽唔慣啫～

成個世博會都係搞visual，搞3D，panorama同變色LED，better city = newer technology，但又有啲流於無聊。加拿大Montreal館有條環保宣傳片係mechanical 3D，一格格升高，幾過癮，不過即係要用摩打，咪又用多啲電囉～

芬蘭館描述嘅未來城市畫面－－芬蘭國寶Nokia為你留影，遊客樣貌會走入大屏幕裡面！

窮啲嘅國家又點呢？孟加拉館成個館基本上貼十幾張海報就算，另外賣下手工藝咁。我覺得貼海報呢招都ok，只要揀得好，足以令遊客了解國家文化，又夠環保！呢張「數碼孟加拉」，同得四幅牆嘅孟加拉館相映成趣，說明幻想係無限嘅！

約旦館主力sell死海，呢邊廂講死海水位逐年下降，嗰邊廂大賣死海鹽產品，仲可以即場享用死海泥facial服務 (當然係收費嘅)！

由中國俾錢起嘅非洲聯合館，好似一個廢置嘅商場，但勝在冷氣夠勁，適合歇腳。非洲國家冇咩好搞，都係賣下精品同非洲鼓咁。呢個檔口特別啲，有土著求偶MV睇，幾得意喎！但係我連個國家名都唔記得囉.......

丹麥某城市嘅案例館，展出多款功能單車！呢架係腳踏BB車，可以放兩個B，備有安全帶，仲有幾款不同設計！單車上路，才是王道！負責介紹嘅丹麥哥哥話我哋講high-level English，可想而知，佢每日serve啲咩人，有幾悶～ (按：唔係個個館都由該國派員當值，好多館都係中國人serve你，幾冇feel。有時又會有啲西人自命普通話好，服務殷勤，但係你一同佢講英文，竟然即刻變臉......)

古代的聚落，攝於土耳其館。個土耳其管理員話香港好貴，唔捨得去，叫我哋有時間一定要去土耳其睇下！

Better City, Better Life，你話，我哋到底喺度追求啲咩呢？喺龐大嘅世博會背後，又掩飾咗幾多嘢呢？

Future係咁？好驚呀我！！

（唔好意思，為咗畫面美觀，我cut走咗上面句中文）


~第四節完~